Иран погуби човек осуден за шпионажа во корист на Израел

Иранските власти погубија човек осуден за шпионажа во корист на Израел, обвинувајќи го за пренесување информации за нуклеарен научник убиен за време на 12-дневната војна на Израел во јуни, објави порталот Мизан на иранското судство.

– Рузбе Вади беше погубен по судењето и откако неговата казна беше потврдена од Врховниот суд – рече изворот. Тој беше обвинет за пренесување информации за „нуклеарен научник кој беше убиен за време на неодамнешната агресија на ционистичкиот режим“.

Осудениот беше обесен. Сè уште не е познато кога бил уапсен или осуден.

Според Мизан, Рузбе Вади работел во една од „клучните и тајни организации“ на Иран, а неговите функции му дозволувале да пренесува „доверливи информации“ откако бил регрутиран преку интернет од Мосад, израелската разузнавачка служба.

Во средината на јуни, Израел започна кампања за бомбардирање против Иран, што доведе до војна во која Техеран одговори со ракети и дронови. Во израелската офанзива беа убиени високи воени лица, нуклеарни научници и стотици други, целејќи и воени објекти и населени области.

Според локалните медиуми, најмалку десетина нуклеарни научници беа убиени за време на офанзивата.

По завршувањето на непријателствата, Иран вети брзи судења за оние осомничени за соработка со Израел. Властите најавија неколку апсења за шпионажа за Израел, како и егзекуции на оние прогласени за виновни за соработка со Мосад.

Дополнително, иранските власти денеска егзекутираа човек прогласен за виновен за припадност на џихадистичката група Исламска држава, за која Мизан рече дека планирала „терористички операции во Иран“. Според групите за човекови права, вклучувајќи ја и Амнести Интернешнл, Иран има втор најголем број егзекуции во светот, надминат само од Кина.

МИА