Ѓоковиќ сака да настапи на ОИ 2028

Српскиот тенисер Новак Ѓоковиќ, кој ја освои олимписката титула во тенис во поединечна конкуренција на Игрите во Париз, најави дека сака да учествува на следната Олимпијада во 2028 година во Лос Анџелес.

Ѓоковиќ во вчерашното финале го совлада Шпанецот Карлос Алкараз со 7:6(3), 7:6(2) и на 37-годишна возраст стана највозрасниот победник на олимпискиот тениски турнир.

„Сè уште сакам да одам во Лос Анџелес. Сакам да ја претставувам мојата земја на Олимпијадата и Дејвис купот. Да бидам искрен, не знам што ќе се случи во иднина, сакам да уживам во сегашниот момент“, рече Ѓоковиќ.

Српската Влада денеска донесе одлука да го награди Ѓоковиќ и неговиот тренер со 200.000 евра за освоеното олимписко злато.