Франгов во интервју за „Еuropean times“ порачува инвеститорите да ги реализираат своите идеи во Гевгелија

Ако имате намера да инвестирате некаде, вистинското место за вас е Гевгелија, им порачува градоначалникот Иван Франгов на читателите на угледниот светски магазин „Еuropean times“ во интервју во кое ги уверува потенцијалните инвеститори дека во Гевгелија ќе ги реализираат своите идеи повеќе и од нивните очекувања.

- Како општина нудиме од 20 до 50 отсто намалување на различни општински даноци и такси. Отворени сме за сите деловни луѓе кои имаат иницијатива. Нашите урбанистички планови ќе ги охрабрат инвеститорите особено во туристичката индустрија, нашите казина и хотели со пет ѕвездички кои се меѓу најдобрите во Македонија. Имаме барања од домашни и странски инвеститори кои се привлечени од нашето поволно бизнис законодавство, ниските даноци и долгата листа владини субвенции за странски директни инвестиции кои се најповолни во Европа, истакнува Франгов.

Историски позната по производството на свила и тутун, општина Гевгелија која се наоѓа на границата на Македонија со Грција, денеска е позната како сервисно ориентиран град со повеќе од 70 компании кои работат во различни сектори и како просперитетна топ туристичка дестинација сместена веднаш до главниот европски коридор Е-75 заклучува престижниот светски магазин.