Македонија
7. August 2020 - 11:57

ДИК изгласа зголемување на надоместоците за членовите на избирачките одбори и општинските изборни комисии

Зголемување на надоместокот за членовите на избирачките одбори на предвремените парламентарни избори за 100 отсто, едногласно изгласа Државната изборна комисија.

Општинските изборни комисии, пак, ќе добијат за 20 проценти поголем надоместок поради успешното организирање на изборите. 

-Голема благодарност до членовите избирачките одбори кои директно беа подложени на голем контакти со гласачите, но почитувајќи здравствените протоколи и правните процедури ние денеска нема кластер „избори“. Затоа се согласувам за зголемување на нивниот надомест од 100 отсто, изјави Елизабета Постоловска од ДИК.

По 6.000 денари надомест ќе добијат и здравствените работници кои беа дел од посебните избирачки одбори. Станува збор за сума, која е највисока што може да се добие за учество во изборите и кои ја добиваат претседателите на избирачките одбори. 

Според Постоловска, не станува збор за награда, туку за заслужен надоместок.

Членовите се согласни дека ДИК ги заштитила граѓаните и истовремено ги организирала изборите. 

-Имавме 3.400 избирачки одбори и 80 општински изборни комисии. Износот на општинските изборни комисии им се зголемува за 20 отсто и тоа, почнувајќи од најмалите општински изборни комисии кои имаат до 20 избирачки места, изнесот им се зголемува за 5.000 денари, а ќе земаат – претседателот 30.000 денари, член 18.000 денари. ОИК кои имаат од 21 до 40 избирачки места износот ќе им се зголемува за 6.000 денари и ќе земат – претседателот 36.000, членовите по 24.000 денари. На ОИК кои имаат од 41 до 70 избирачките одборот износот за претседателот ќе биде 48.000 денари, за членот 36.000 денари. На ОИК кои имаат 71 до 100 избирачки одбори износот за претседателот ќе биде 60.000 денари, 48.000 за членот. На ОИК кои имаат од 101 до 130 избирачки одбори претседателот ќе добие 66.000 денари, а членот 54.000 денари. И на ОИК кои имаат над 131 избирачките одбори за претседателот ќе биде 72.000, а за членот 60.000 денари, истакна Јанаќе Витановски.  

Претседателот на ДИК, Оливер Дерковски уверува дека вкупните износи кои ќе се исплатат по основ на надоместоци за предвремените парламентарни избори ќе бидат речиси идентични како тие што беа исплатени за претседателските избори.

-Минатите претседателски избори за избирачките одбори исплативме околу 139 милиони денари за 35.000 луѓе. Ќе исплатиме и сега иста сума. За ОИК исплативме околу 20 милиони денари и сега ќе исплатиме отприлика толку, 23-24 милиони денари. Значи средствата се истите тие кои што беа проектирани во буџетот. Сега имаше еден круг, меѓутоа имаше посебна ситуација. Се гласаше во три дена, имаме посебни избирачки одбори, имавме посебна ситуација, а тоа впрочем го образложија останатите членови. Од тие причини, уште на стартот кажавме дека ќе ги наградиме сите посебно, зашто ќе работат во исклучително сложени и комплицинирани услови, особено од аспект на здравствената заштита, рече Дерковски, додавајќи дека има заштеда кај јавните набавки, но и околу 30 милиони денари кај гласањето на дијаспората.
 
Сепак, членовите на ДИК потенцираат дека тие нема да земат никакви надоместоци освен основната плата.
 
Даниел Василев