Дебата: Политиката да се тргне настрана од економијата

 Наламување на регулацијата и ослободување на пазарот за секој да може да го почне својот бизнис како што сака. Ова е најбрзиот начин за намалување на невработеноста и за зголемување на животниот стандард во земјава, беше речено на денешната дебата „Креирање нови работни места и поттикнување на претприемништвото преку концептот на хибриден пазарен модел „sharing economy“ и засилување на европската демократија“.

Експертите присутни на дебатата порачаа дека економијата најдобро просперира кога власта се држи настрана од бизнисот и го остава пазарот сам да ги реши своите проблеми, сам да ги обезбеди и да ги алоцира средствата за функционирање. Не е битен квантитетот, туку квалитетот на работните места, тие треба да бидат продуктивни.

За зголемување на претприемништвото и на бројот вработени, беше речено, покрај намалување на даноците, е неопходно и кратење на државните субвенции.

- Граѓаните треба да прават сопствен избор, да носат сопствени одлуки и да инвестираат во она што сами ќе одлучат. Би било подобро власта помалку да се меша, а тие да имаат поголема слобода, истакна Рандал О Тул, виш научен соработник во САТО Институтот кој работи на прашања поврзани со урбаниот развој, јавното земјиште и транспортот.

О Тул смета дека токму граѓаните знаат што е најдобро за нив, поради што, нагласи, и не е се толку неопходни владините поддршки. 

Според Мајкл Вилијамс, основач на Алтиус Фајненшл, инвестициски советник и сертифициран финансиски консултант, за успешен бизнис, младите треба да го изберат она што навистина сакаат да го работат, она кон кое имаат афинетет. - Треба да размислат за што се најмногу заинтересирани, во што може да бидат најпродуктивни и што најмногу ги исполнува, но, од друга страна, треба да се слуша и пазарот, да се знае, анализира, што навистина му е неопходно и што бара, истакна Вилијамс.

Субвенциите за вработувањето се, како што оцени, грешка. -  Граѓаните треба да го имаат сопствениот капитал кај себе зашто во секој случај носат и прават подобри одлуки од политичарите, подвлече Вилијамс.

И според  студентската организација „Студенти за слобода“, ако парите се кај пазарот, многу полесно можат да отворат работни места и да го зголемат стандардот. - Ние се бориме за таквите политики, за таа филозофија, зашто преку неа ќе напредуваме полесно и побрзо, нагласи Наум Локоски од  „Студенти за слобода“.

Дебата ја организираа Австрискиот економски центар од Виена и Правниот факултет во Скопје во рамки на меѓународната конференција „Европа во време на промени“.