Белгискиот сенатор Ванлуве порача дека лабавото владеење на социјалдемократите во Брисел довело до создавање на исламо-социјализам

Дваесет години од лабавото владеење на социјалдемократите и воведувањето на исламо-социјализам не донесоа овде каде што сме, а тоа е Брисел да биде база за исламско варварство.

Ова го порача белгискиот сенатор Карл Ванлуве од редовите на фламанската националистичка партија „Н-ВА” во интервју за дневниот весник „Ле соар“, откако европската и белгиска престолнина веќе четврти ден е воено-полициски окупирана, со највисок (четврти) степен на закана од тероризам, а по терористичкиот напад во Париз на 13 ноември, каде се покажа дека речиси сите од извршителите биле лица со белгиско државјанство, жители на бриселската општина Моленбек-Сен Жан.

Според овој фламански политичар, бриселските социјалдемократи, преку „екстремната толеранција“ создале во главниот град на Кралството Белгија еден вид на „почва за нетолеранција кон западното општество”.

- Регионот на Брисел не може и не сака да се справи со вистинските проблеми. На регионот му се потребни промени, политичката култура и структурите да се справат со радикализмот и несигурноста, порача сенаторот Ванлуве.

Според весникот „Ле Соар“, фламанската националистичка партија “Н-ВА”, која е најсилен партнер во Владата на Белгија составена од четири политички сили, ја повлекува т.н. „бела карта“ за кревкото, но реално национално единство што досега постоеше во сенаторскиот Дом.