АХВ: Во Македонија нема холандски јајца со инсектициди

Во Македонија нема увоз на конзумни јајца од Холандија за кои Европската комисија предупреди дека дел од количините пласирани во неколку европски земји се загадени со инсектициди, соопшти денеска Агенцијата за храна и ветеринарство (АХВ).

Според АХВ, единствен увоз на овој производ во земјава е од Република Србија од каде во првите шест месеци од 2017 година биле увезени вкупно 162.560 килограми конзумни јајца, а во 2016 година 509.402 килограми.

- Домашното производство и увозот на конзумни јајца во Република Македонија се под постојана контрола на официјални ветеринари од Агенцијата за храна и ветеринарство. Од досега извршените контроли и реализацијата на Националната мониторинг програма не се евидентирани отстапувања во поглед на безбедноста, ниту во домашното производство, ниту во увезените количини, наведува АХВ.