Зохар: Израел не сака привремено примирје, туку крај на војната и враќање на заложниците

Израелскиот министер за култура, Мики Зохар, денес соопшти дека спогодбата за привремен прекин на огнот со цел ослободување на заложниците кои ги зароби Хамас во Газа, не е приоритетна тема на денешната владина сесија.

„Тајмс оф Израел“ го цитира министерот кој категорично тврди дека „Израел се залага само за сеопфатен договор за прекин на огнот и враќање на заложниците“. Тој додава: „Веќе нема можност за делумен договор“.

Зохар за Канал 12 изјави: „Тоа не е на нашата агенда. Единствената тема е завршување на војната, се разбира, со враќање на сите заложници и демилитаризација на Појасот Газа“.

Пред две седмици, Хамас објави дека ќе се согласи на двомесечно примирје во склоп на кое би ослободил 10 од 48-те израелски заложници за кои тврди дека се’ уште се живи во Газа.

Израелската влада не даде одговор на оваа понуда и продолжува со подготовките за преземање на контролата над градот Газа.