Во Штип ќе се отвори првиот Центар за рехабилитација за деца со попречености

Штип ќе го добие првиот Центар за рехабилитација за лица со посебни потреби во државата. Центарот ќе биде сместен во дел од зградата на средното текстилно училиште, а средствата се обезбедени преку централниот буџет, со 15 % кофинансирање од страна на општината.

- Одвојуваме повеќе од 11 милиони денари заедно со општината. Ќе биде опремен, но она што го разговаравме заеднички со претставниците на родителите е дека треба да се фокусираме на Програмата за работа на децата со попреченост, изјави Ѓоко Велковски, заменик министер за социјална политика, демографија и млади

Зоран Мијалков родител на деца со посебни потреби вели дека ова е прв чекор и надеж дека ќе се слушне и нивниот глас .

- Oва е прв пат и нашиот глас да е важен. Претходно само ни беше сервирано што планира државата, без нас да не праша кои сме крајни корисници и најдобро знаеме што треба за нас и нашите деца. Во овој случај се надевам дека ќе се постигне тоа што децата ќе добијат рехабилитација, помалите деца и младинците, а најважното е, работната терапија, изјави Зоран Мијалков, родител на деца со попреченост

Улогата на Центарот е работно да ги оспособи овие деца за подоцна да си го најдат своето место на пазарот на трудот.  

- Мораме да направиме дополнителен чекор за работно ангажирање на овие лица, преку средби со бизнис секторот, да се отворат можности истите лица да имаат дневни активности и на други локации во градот, за да има ефект при работењето со лица со попречености, изјави Иван Јорданов, градоначалник на Штип

Првично се планира да бидат прифатени 24 деца и младинци со кои ќе се работи по неколку часа дневно.