Средба Силјановска - Радев утре во Софија

Нова средба на претседателката Гордана Силјановска Давкова со бугарскиот колега Румен Радев утре во Софија, потврдија од нејзиниот кабинет.

Билатералната средба е на покана на Радев, а се очекува освен за помошта на Бугарија по тргедијата во Кочани и  пациентите кои се згрижени во бугарските болници, да разговарат и за билатералните односи по острите пораки кои ги разменија двете страни.

Последната средба на Силјановска со Радев беше во ноември лани, на маргините на Конференцијата за климатски промени во Баку, каде повикаа на продолжување на билатералниот дијалог и брзо решавање на отворените прашања.

Во рамки на дводнвената работна посета на Бугарија, македонската претседателка ќе биде и дел од состанок на шефови на држави и влади на „Акаба процес Балкан III“ во Софија.

Посетата се реализира на покана на претседателот на Република Бугарија, Румен Радев и кралот на Хашемитското Кралство Јордан, Абдула Втори.Македонската претседателка ќе говори на првата сесија од состанокот насловена „Идентификување и разбирање на заканите“. Предвидена е и билатерална средба на претседателката Сиљановска-Давкова со кралот на Хашемитското Кралство Јордан, Абдула Втори, велат од Вила Водно.

Во рамки на престојот во Софија претседателката Сиљановска-Давкова ја посети и болницата „Пирогов“ каде што се лекуваат дел од повредените од пожарот во Кочани.