Преглед на вестите од светот

Се уште критична е состојбата на еден од повредените во крвавиот новогодишен масакар во црногорскиот град Цетиње. Тој има прострелна рана во главата и лекарите се уште се борат за неговиот живот. Останатите три лица кои се во болница се надвор од животна опасност. Во средата 45 годишен маж на повеќе локации низ градот уби 12 лица, главно роднини и пријатели по што се самоуби. 
Црна гора веќе прогласи ден на жалост а во недела, ден на жалост е прогласен и во Србија. 

Украинскиот Претседател смета дека Доналд Трамп ќе биде клучен за епилогот на руско украинската војна. Зеленски истакна дека веќе имал неколку разговори со новоизбраниот американски претседател и дека, според него, Трамп е „силен и непредвидлив“ и дека се надева дека оваа негова непредвидливост ќе се покаже во однос на Русија. Враќањето на Доналд Трамп во Белата куќа ги буди надежите во Киев за одлучувачки одлуки по речиси три години војна, но и стравувањата дека американската воена и финансиска помош, која републиканецот често ја критикуваше,дека може да се намали.

Велика Британија се соочува со поплави по интензивните врнежи на дожд кои за само два дена го надминаа месечниот просек. Во областа околу Манчестер надлежните вршат евакуација на населението кое што се наоѓа во најпогодените региони. Врнежите целосно ги поплавија улиците а во делови на Англија има заглавени автомобили поради што надлежните служби прогласија состојба на природна катастрофа. До овој момент нема инфорамции за жртви а материјалната штета дополнително ќе се утврдува.