Откако Палевски беше отстранет од судница, Кешишев раскажа како биле грабнати и убиени Вања и Панче

Кешишев дури чувал стража, го видел Палевски со пиштол, потоа слушнал истрел па го повикале да помогне да ја закопаат Вања во местото Бразди. Палевски потоа ги исчистил лопатите со спреј ВД-40 и на 500 метри од каде го закопале девојчето му наредил на Кешишев да ги фрли лопатите покрај патот. 

Обвинетиот Кешишев денеска одговараше на прашања на одбраната и обвинителството, но Палевски беше отстранет од судницата, по барање на одбраната на Кешишев, бидејќи му било страв да одговара пред него. 

„Се свртев едно 3-4 пати да видам што се случува, првиот пат разговараа, гепекот беше отворен, не знам, зошто бев подалеку. После се завртев видов дека копаат, последниот пат кога се завртев Палчо во раката држеше пиштол. Тоа јасно се гледа, не беше многу далеку 20 метри. Пак се свртев и видов истрел, пукање ама некако тапо, како неприслушно. На крајот ме викнаа да побрзаме да се затрупа телото, пак не го видов зошто беше покриено со земја“.

Дупката каде што беше пронајден мртов Панче Жежовски, ја копале Кешишев и Велибор Манев една година претходно. Еден месец, секоја недела оделе до местото, Манев копал, а Кешишев ја исфрлал земјата. Кешишев мислел дека копаат злато. По некое време го прашал Манев за што е дупката, по што дознал дека е за киднапирање. 

„Третиот пат кога отидовме исто во недела јас и Вељо влеговме подлабоко во дупката и тогаш ми кажа дека за ова не треба никој да знае зошто може и глави да летаат. Ме предупреди да имам до знаење, бидејќи дупката била замислена за намена за киднапирање на лица. Четвртиот пат ја завршивме дупката, Вељо и стави поклопец и се вративме назад во штабот и му кажа на Палчо дека се е во ред и дека ја има длабочината“.

Кешишев не видел кој и како го убил Панче, а откако дознал дека е мртов, не пријавил зошто бил збунет и Палевски му забранил да ги напушти просториите на партијата. 

Палевски во телефон му бил мемориран како „царот“, а Кешишев ги исполнувал сите наредби кој му биле дадени од Палевски. Според неговиот адвокат, тој бил заложник на дел од обвинетите и постапувал како ќе му наределе.

Според адвокатот на Палевски, станува збор за хајка, а Кешишев правел драми во судот. 

На следното рочиште продолжува распитот на Кешишев од одбраната на другите обвинети.