Македонија со идеални услови за производство на органска храна

Во Македонија постојат идеални услови за органско производство, но главниот проблем е неусогласеноста помеѓу понудата и побарувачката. Тоа за земјоделците кои се одлучуваат за оваа аграрна гранка претставува и еден од главните предизвици во работењето. Досегашните искуства на производителите покажуваат дека производството на органски производи може да биде поедноставно од пласманот.

За разлика од конвенционалното земјоделство, кое има јасни канали за дистрибуција, органските производи често се ограничени во пристапот до пазари и потрошувачи. Според Ѓорѓи Хаџи Котаров од здружението Органологистик овој проблем може да се реши со формирање на специјализирани откупни центри, или пак отварање на посебни пунктови во веќе постоечките,  но со исклучителна намена за органските производители.

Освен откупни центри, за вистински развој на органското производство потребна е и поголема едукација и поттикнување на свеста на потрошувачите за вредноста и придобивките од органските производи, како и на создавање услови за долгорочна стабилност на производството.

Органските производи од Македонија најчесто се пласираат на домашниот пазар по цени кои се само 30 до 50% повисоки во однос на производите добиени на конвенционален начин.