Семејствата на жртвите од модуларната болница бараат обнова на истрагата

Да се најдат вистинските виновници за пожарот во модуларната болница во Тетово и обвинителот Љупчо Коцевски да ја обнови истрагата- ова го побараа денеска семејствата на загинатите во болницата. Велат дека целата јавност знае за пропустите при изградбата на модуларната, а тоа било потврдено и со германското вештачење, доказ кој бил отфрлен од обвинителството.

Бараат вештачењето од германските експерти да се земе предвид како клучен доказ, а на Коцевски му се обратија како сограѓанин од Тетово да сочувствува со нив и да бидат казнети виновниците за смртта на нивните блиски.

Денеска пак се одржа ново рочиште во тетовскиот суд за пожарот во модуларната болница.  Јавните обвинители изнесуваа докази, а се испрашуваа и вештаците од страна на обвинителството и одбраната на обвинетите, кои направиле вештачења веднаш по пожарот.

Предметот се врати на повторено судење минатиот месец, откако Апелациониот суд во Гостивар во април минатата годинма донесе решение да има повторно судење за двајцата поранешни директори Флорин Бесими и Артан Етеми за кривично дело „тешки дела против општата сигурност“, и болницата како правен субјект.

Тие беа осудени на условни казни од година и половина, додека докторот Бобан Вучевски доби ослободителна пресуда.

Во пожарот на 8 септември 2021 година, животот го загубија 14 лица, истражната постапка траеше речиси десет месеци. Како причина за пожарот беше наведен кабел кој прегорел, а од искрите пожарот се проширил и за неколку минути се запалила и целата болница.