На чекор сме до генерален штрајк во цела држава, предупреди ССМ на протестот за повисоки плати

Со минута молк за загинатите во кочанската дискотека, Сојузот на синдикати ја почна јавната седница пред Работничкиот дом. Оттаму се упатија кон Собранието, каде побараа минималната плата да биде 500 евра, а сите останати плати да се зголемат за 100 евра.

„Да си ги намалите вашите луксузни пратенички плати на минимална плата, се додека не ги зголемите работничките плати“ – Слободан Трендафилов, претседател на ССМ 

Продолжија пред Стопанската комора. На работодавачите им порачаа да ги зголемат платите бидејќи секоја година по 10 илјади млади луѓе ја напуштаат Македонија и бараат работа во странство.

„Зголемете ги платите затоа што немаме резервна држава. Ќе си одите вие од Македонија, не ние“ – Иван Пешевски, претседател на СГИП

„Верувајте младиот работник за 500 евра не сака ни да помириса компанија да дојде да работи“ – Игор Герасов, претседател на СИЕР

Протестот заврши пред Владата. Одлуката за 24.400 денари минималната плата ја нарекоа незаконска оти е без мислење од синдикатите и побараа веднаш да биде повлечена.

„На чекор сме до генерален штрајк во целата држава. Немојте да заборавите дека работник ве бира и дека многу лесно, како претходните, од удобната функционерска фотелја ќе се симнете на тврдо работничко столче“ – Слободан Трендафилов, претседател на ССМ

„Со 1.890 денари во управа и правосудство 98% моментално вработени се под просек. Ако тоа не е срамота, не знам што е срамота“ – Трпе Деаноски, претседател на УПОЗ

Министерот за економија, пак, рече дека одлуката ја потпишал според Законот за минимална плата, а мислење од економско-социјалниот совет немало зашто синдикатите се уште немаат репрезентативност.

„Замислете ако не ја објавевме до 31 март. Ќе се блокираше целата држава, ќе се блокираа институциите и приватниот сектор не можеше да пресмета плати за нивните вработени“ – Бесар Дурмиши, министер за економија и труд

СДСМ ги поддржува барањата на работниците, но не стои зад протестите на синдикатите, вели Филипче.

„Очигледно е дека тоа се автентични протести на работниците имајќи ги предвид нивните барања. Ние излеговме со неколку предлози кои, за жал, Владата во изминатиот период не ги прифати“ – Венко Филипче, претседател на СДСМ

Според податоците од УЈП, околу 20 илјади работници земаат минимална плата.