Клиниката за физикална медицина се подготвува да ги прими првите пациенти од пожарот во Кочани за рехабилитација

Уште тројца повредени во пожарот во дискотеката во Кочани денеска се враќаат во Македонија. Двајца беа испратени на лекување во Грција, а еден во Шведска. Во странски центри остануваат уште 76 пациенти. Најмногу се во Србија, Бугарија, Турција и Грција...

Во меѓувреме Клиниката за физикална медицина во Козле се подготвува да ги прими првите повредени на кои им е потребна рехабилитација кон средината на април. Од установата велат дека во тек е процес на едукации на персоналот со помош на СЗО и тимови од Англија кои се дојдени да помогнат и да го пренесат нивното искуство за најсовремените методи токму за изгореници.

- Рехабилитацијата ќе биде фокусирана на рехабилитација на изгорениците на кожата и изгореници на респираторниот систем и целокупната едукација која ќе биде направена станува збор за многу специфична едукација за да се унапреди знаењето на целиот персонал на клиниката која треба да даде квалитетни резултати, изјави д-р Злате Мехмедовиќ, директор на Клиниката за физикална медицина и рехабилитација Козле.

На Клиниката ќе има и посебен дел за оние пациенти на кои им се потребни стерилни услови. 

- Ќе постои посебен дел за изолација каде ќе бидат сместени пациентите кои имаат отворени рани, потребни се стерилни услови бидејќи можноста за инфекции кај ваквите случаи е исклучително висока, останатите ќе бидат сместени на оддели каде нема потреба од изолација. Клиниката на располагање има 191 кревет, рече д-р Мехмедовиќ.

На болничко лекување во македонските здравствени установи остануваат 17 повредени, меѓу нив се и 6 –те пациенти во Клиниката за хируршки болести на кои им беа направени трансплантации на кожа.