43 килограми злато вредно 2,3 милиони евра запленето на скопскиот аеродром | ФОТО
„Вчера во вечерните часови на Меѓународниот аеродром Скопје, царинските службеници открија и запленија над 43 килограми златен накит. Ова е рекордна заплена на златен накит, која се проценува на вредност од околу 2,3 милиони евра“, изјави директорката на Царинска управа, Славица Кутиров, на прес-конференција на која информираше за заплената на златниот накит.
Имено, по претходни сознанија и основан сомнеж, лице со српска патна исправа, кое пристигнало со редовниот вечерен лет од Истанбул, е упатено на детален претрес и преглед на багажот. Притоа во неговиот куфер и рачниот багаж е откриен разновиден златен накит пакуван во најлонски ќеси, меѓу кои и накит од бело злато со дијаманти со приложени сертификати. Лицето претходно се упатило на зелен канал и не ја пријавило стоката.
Лицето и стоката се привремено задржани и во моментот се спроведува истрага. Во истрагата се вклучени Секторот за контрола и истраги и Секторот за професионална одговорност на Царинската управа. За случајот веднаш e известен дежурниот јавен обвинител заради спроведување на понатамошни истражни дејства.
„Царинската управа во рамки на своите приоритети за заштита на општеството и безбедноста на граѓаните, е силно фокусирана на борба против криминал и спречување на нелегална трговија. Во 2022 година бележиме двојно зголемување на бројот на случаи на спречување на недозволена трговија во сите категории во однос на 2021 година“, истакна Кутиров.
Споредено со 2021 година, кога имало 58 случаи на заплени, минатата година се евидентирани вкупно 114 случаи на заплени, и тоа: над 8 тони дроги и психотропни супстанци, како и заплени на девизи, злато и акцизна стока во вредност од над 2 милиони евра. Од нив во 5 случаи се запленети 33.8 килограми злато, со проценета вредност од околу 1.5 милион евра. Истото е предадено на Агенцијата за одземен имот, која понатаму го депонира во Народната Банка, до правосилно завршување на судската постапка.
Од почетокот на 2023 година како што информираше Кутиров, Царинската управа бележи 18 случаи на спречување на недозволена трговија во повеќе категории, меѓу кои: 2 случаи со околу 50 килограми запленети дроги и психотропни супстанци, 9 случаи на заплена на акцизна стока (тутун и преработки од тутун, електронски цигари и тутун за наргиле), 3 случаи на заплени на девизи со вкупен износ од над 90 илјади евра, како и 2 случаи на заплена на злато, вклучувајќи го и овој случај, со вкупна проценета вредност од над 2,3 милиони евра.
Ново на Сител
-
Грчката фрегата соборила беспилотно летало во Црвеното море во рамките на операцијата „Аспидес“
-
Александар Ѓорчевски со нова жалба пред Врховен
-
Почина Велибор Џаровски - Џаро
-
Приведен тетовец баран со потерница
-
Ограбено тетовско казино, уапсени две лица
-
Судот на БИХ одреди притвор за три лица уапсени под сомнение дека соработувале со картел кој шверцувал дрога од Латинска Америка во Европа
-
ОН: Речиси 282 милиони луѓе ширум светот се соочиле со акутен глад во 2023 година
-
Папата Франциск за конфликтите во Украина и Газа: Договорен мир е подобар од бескрајна војна