Зеленски: Ќе се сретнам со Трамп во Вашингтон в петок

Украинскиот претседател Володимир Зеленски денеска изјави дека ќе се сретне со американскиот претседател Доналд Трамп во Вашингтон в петок, каде што се очекува двајцата лидери да разговараат за оружје за Киев во војната против Русија, првенствено ракети „Томахавк“ со долг дострел.

Во изјава за новинарите во Киев, Зеленски рече дека споделил со американскиот претседател „визија“ за тоа колку американски ракети „Томахавк“ ѝ се потребни на Украина во војната против Русија. Тој додаде дека ќе разговара за деталите со Трамп в петок.

Еден од изворите запознаени со планирањето на состанокот рече дека се очекува главните теми да вклучуваат воздушна одбрана, дополнително американско оружје за Киев и потенцијално враќање на Русија на преговарачката маса.

Зеленски лобира во Вашингтон за снабдување со американски ракети „Томахавк“, кои имаат способност да ја погодат Москва, но за кои Украинците велат дека ќе се користат само врз воени цели.

Москва рече дека таков потег би претставувал сериозна ескалација.

Се очекува висока украинска делегација, предводена од премиерката Јулија Свириденко, да пристигне во Вашингтон пред состанокот в петок за да ги постави темелите за разговорите на лидерите, изјави изворот. 

МИА