Зеленски и се заблагодари на ЕУ за финансискиот пакет од 90 милијарди евра

Украинскиот претседател Володимир Зеленски денеска им се заблагодари на европските лидери по нивниот договор за дополнително финансирање на неговата земја.

– Ова е значајна поддршка која навистина ја зајакнува нашата отпорност, напиша тој во објава на X.

Зеленски истакна дека „е важно руските средства да останат замрзнати“ и Украина да добие финансиски гаранции за наредните години.По неколку месечен спор, земјите-членки на ЕУ рано утрово постигнаа компромис за финансирање на Украина во наредните две години, но без да го преземат контроверзниот чекор за директно користење на замрзнатите руски средства, пренесе ДПА.

Според договорот, Украина ќе добие бескаматен заем од 90 милијарди евра. Ако Русија не плати обесштетување за воените штети, замрзнатите руски средства во ЕУ ќе се користат за отплата на заемот.