За две години целосна современа документација за македонско-бугарската граница

Целосна современа гранична документација за државната граница на Македонија со Бугарија, што е во должина од 185 километри, треба да биде изготвена до 2019 година. Ќе ја замени старата описна документација и ќе понуди брзи и точни податоци за секој дел од границата според европски стандарди.

- Активностите ги почнавме во 2013 година, а амбициите ни се до 2019 година да имаме целосно нова гранична документација за границата. Тоа ќе биде на европско ниво, со европски стандарди и исклучително точна. Нема да биде како старата описна документација, туку ќе има мерна вредност. При случување гранични  инциденти брзо и точно може да се утврди секој дел на границата, изјави денеска Пламен Танев, началник на сектор за геодезија и картографија при Министерството за внатрешни работи на Бугарија.

Танев е дел од работната група што престојува во македонскиот Катастар за утврдување на идните активности за снимање и премер.

Современа гранична документација е изготвена за 45 километри од државната граница на Македонија со Бугарија,  од граничен столб 50 до граничен столб 72. На тој дел во 2013 година е направен премер и аерофотограметриско снимање. Собрани се податоци за сите прекршни точки на граничната линија и  за нив се одредени координати во државниот координатен систем. Од аерофотограметриското  снимање извршена е обработка на снимките и изготвени се 16 карти во размер 1:5000, во картографска и ортофото верзија. Надлежните институции од двете држави лани од јули до октомври  извршија теренско снимање и на границата од граничен столб 72 до граничен столб 106 (тромеѓе меѓу Македонија, Србија и Бугарија) во должина од 70 километри. За тој дел од границата, како што информира директорот на македонскиот Катастар Славче Трпески, за годинава е предвидено да се направи аерофотограметриско снимање и комплетна обработка на податоците од премерот и снимањето.

- Со програмата на Министерството за надворешни работи за снимање  и премер на заедничката граница со Република Бугарија за 2017 година, предвидено е да се изврши премер од граничниот столб 50 до тромеѓата меѓу Република Македонија, Република Бугарија и Република Грција, рече Трпески.

Тој потенцира дека Македонија е единствена држава од поранешните југословенски републики со решени државни граници со соседните држави. За државната граница со Грција граничната документација е изработена во 1987 година, а за државната граница со Република Србија и Република Косово границата е обележена и за неа е изготвена најсовремена гранична документација заклучно со 2012 година. Државната граница со Република Албанија и Република Бугарија е дефинирана и за неа постои описна документација, но неопходно е да се изврши премер за да се изготви современа гранична документација.

Активностите за граничната докумнетација се согласно потпишаната Спогодба помеѓу владите на Македонија и на Бугарија во 2000 година, врз основа на која е формирана е Мешовита комисија за чување, одржување, обновување и обележување на македонско-бугарската државна граница.