Вучиќ издаде наредба ако е потребно херметички да се затворат границите

По пишувањето на српските медиуми, српскиот претседател Александар Вучиќ денес потврди дека издал наредба ако е потребно, поради мигранстската криза, херметички да се затворат границите, јави дописникот на МИА од Белград.

– Издадов наредба на српската војска, го замолив Бирото за соработка со сите (безбедоносни) служби, како и МВР, и српската Влада, доколку дојде до загрозување на националната безбедност, можеме речиси херметички да ги затвориме границите на нашата земја, изјави Вучиќ.

Тој додаде дека Србија отсекогаш покажувала солидарност и им помагала на мигрантите, но, како што кажа, „ние да бидеме единствена жртва, и земјите од Западен Балкан тоа да бидат, тоа нема да се случи“.

– Ќе ја затвориме границата во рок од 12 часа ако е потребно. Веќе почнавме да работиме на некои работи, но се надевам дека тоа нема да се случи, истакна Вучиќ.

Претходно денеска српската премиерка Ана Брнабиќ одржа состанок на кој беше запознаена со актуелната состојба во однос на движењата на мигрантите и координацијата на работата на државните органи, на кој е констатирано дека нема зголемен притисок на мигранти на границите на Србија, дека состојбата на границите на Турција и Грција се стабилизира, истакнувајќи дека бројот на мигранти е на исто ниво како и во претходните месеци.