Втора турнирска победа за Ѓорческа во 2016 година

Најдобрата македонска тенисерка Лина Ѓорческа на убедлив начин го заврши настапот на фјучрсот во турскиот град Маниса, што се играше за награден фонд од 10.000 долари. Таа денеска во финалето на Алона Фомина од Украина и препушто само три гема и без загубен сет со пет победи го освои пехарот на овој турнир.

Во двата сета со 6:1 и 6:2 во гемови нашата тенисерка беше поуспешна и со победата на турнирот освои и 12 нови поени. Мечот траше точно еден час, а скорот на освоени поени беше 58:33 за Ѓорческа.

Ова за Ѓорческа е седма турнирска победа во поединечна конкуренција или втора во 2016 година, а откако го откажа настапот на фјучрсот во Тунис, следниот ќе го има во уграрскиот град Ѓер каде ќе игра на турнир со награден фонд од 25.000 долари.