Во пожарот во сиропиталиште загинаа 39 девојчиња

Бројот на настраданите девојчиња во пожарот во државното сиропиталиште за деца во Гватемала, денеска се искачи на 39, а уште неколку девојчиња се наоѓаат во критична здравствена состојба.

Претставниците на болницата Рузвелт соопштија дека вчера уште две девојчиња им подлегнале на повредите.

Сите девојчиња кои починаа во пожарот се на возраст меѓу 14 и 17 години.

Пожарот изби во средата, откако девојчињата, кои биле заклучени поради обид за бегство, ги запалиле душеците со цел да привлечат внимание.

Илјадници лица протестираа синоќа против Владата на улиците на Гватемала, при тоа читајќи ги имињата и возраста на настраданите девојчиња.

Со засолништето за деца управуваат државни социјални служби и во него се сместени млади на возраст до 18 години, кои биле жртви на злоставување во семејствата или живееле на улица, а во засолништето се сместуваат по налог на суд.