Во Неготино на продажба четири парцели за изградба на винарии

Државно градежно земјиште за изградба на винарии, објекти за индивидуално домување, фотоволтаични централи и парцела за изградба на капацитет од Г2-лесна и незагадувачка индустрија продава локалната самоуправа Неготино.

- Во реонот на село Курија на продажба се понудени четири градежни парцели со површина од 1.490 до 3.490 метри квадратни и почетна цена од 61 денар за квадрат за изградба на винарии, четири градежни парцели за објекти за индивидуално домување со површина од 374 до 509 метри квадратни и почетна цена од 373 денари за квадрат, како и четири парцели за изградба на сончеви фотоволтаични централи со површина од 1.971 до 2.391 метар квадратен и почетна цена од 150 денари за квадрат, вели за МИА неготинскиот градоначалник Ванчо Апостолов.

Општина Неготино воедно објави продажба и на една градежна парцела со површина од 1.698 метри квадратни и почетна цена од 61 денар за квадрат, во Индустриската зона Урбан блок 1 во Неготино, со намена за изградба на капацитет од Г2 –лесна и незагадувачка индустрија.