Во Италија уапсен висок шеф на Ндрангета

Висок шеф на мафијашката организација Ндрангета, кој се криел од 2016 година, е уапсен во рурална област во Калабрија, соопшти италијанската полиција.

Полицијата прецизира дека 57-годишниот Џузепе Пеле бил откриен синоќа во куќа во Кондофури, мало гратче во близина на планината Аспромонте.

- Ова е особено важно апсење, затоа што Пеле беше меѓу оние кои носеа стратешки одлуки во Ндрангета, изјави обвинителот од одделот „Антимафија“ Гаетано Пачи.

Пеле ќе одлежи казна од две години, пет месеци и 20 дена за членство во мафијашка организација и обид за изнудување пари, а додека се криеше против него беше издадена и уште една потерница под обвинение за други кривични дела поврзани со мафијашка дејност.