Во Црна Гора се укинува полицискиот час за време на празниците

Министерството за здравство на Црна Гора издаде изменета наредба за укинување на полицискиот час од 22 до 5 часот наутро за време на претстојните божиќни и новогодишни празници.

Со новата наредба на Министерството за здравство, полицискиот час е укинат од 22 часот на 24 декември до 5 часот наутро на 25 декември, од 22 часот на 31 декември до 5 часот наутро на 2 јануари 2021 година и од 22 часот на 5 јануари до 5 часот наутро на 7 јануари.

Забраната за меѓуградски сообраќај за време на викендите останува на сила, од петок во 22 часот до понеделник во 5 часот наутро, се наведува во изменетата наредба на црногорското Министерство за здравство.

Во последните 24 часа во Црна Гора регистрирани се 520 случаи на коронавирус, а двајца пациенти починале. Бројот на моментно активни случаи во Црна Гора е 9.015.

Вкупниот број на смртни случаи поврзани со коронавирус е 630 од почетокот на јуни, а 639 од почетокот на годината.