ВМРО-ДПМНЕ: Во изминатиот период зголемени платите во судството

ВМРО-ДПМНЕ преку соопштение реагираше на денешната изјава на портпаролот на СДСМ Петре Шилегов во врска со платите на судската администрација за време на штрајк.

- СДСМ денеска покажа дека штрајкот на мал дел од судската администрација е само во функција на нивниот страв од изборно соочување и продолжение на деструктивното однесување. Во изминатиот период платата на раководните судски службеници е зголемена над 15 проценти, на стручните судски службеници над 20 проценти, а на административно-техничките над 30 проценти, посочува ВМРО-ДПМНЕ.

Оттаму истакнуваат дека СДСМ покажува лажна грижа за судската администрација, додека нивни блиски добиваат големи плати во Специјалното јавно обвинителство.

- СДСМ знае дека нема бегање од одговорноста и дека порано или подоцна правдата ќе го стигне единствениот политичар кој е аболициран за криминал тежок 8 милиони евра. се вели во реакцијата на ВМРО-ДПМНЕ.