ВМРО-ДПМНЕ: СДСМ го изгуби мнозинството во Советот во Струмица

СДСМ го изгуби мнозинството во Советот на Општината и не се веќе на власт, зашто немаат кредибилитет, истакна на денешната прес-конференција кооординаторот на советничката група на ВМРО-ДПМНЕ Зоран Пакетов.

Според него, оваа советничка група деновиве успеала во своите редови да го придобие кандидатот советник од ВМРО-НП, со што го добиле потребното мнозинство од 12 советници, наспроти во моментов 10 на СДСМ.

- Коалицијата предводена од ВМРО-ДПМНЕ „За подобра Македонија“ и ВМРО-НП имаат легитимно мнозинство во Советот на општината. На последната седница се гласаше за дневен ред каде што немаше расположение од советничката група на СДСМ и ја блокираa работата на седницата и на комисијата зa мандатни прашања. Се потрудивме во интерес на граѓаните во коалиција со советникот од ВМРО-НП да го одблокираме работењето на Советот на Општина Струмица, рече Пакетов.

Новата советничка група бара одржување итна седница, избор на нов претседател на Советот и нов градоначалник.

- Бараме итно да се свика седница на Советот со која ќе се верификува новото советничко мнозинство и ќе се избере нов претседател на советот. Ќе побараме избор на нов градоначалник на општина Струмица затоа што Зоран Заев нема легитимитет, не е веќе власт во Струмица, рече Пакетов.

Според него, ова значи нов почеток во Струмица.

- Ова е нов почеток во Струмица. Почнува транспарентно и отчетно работење во општина Струмица. Ова значи крај на нетранспарентноста и матни тендери и богатење на поединци на грбот на општина Струмица. Ова значи крај на ерата на заплашување и притисоци. Струмичани добиваат одговорна власт за граѓаните. Ќе биде направена ревизија на работењето на сите општински институции. И започнува нов почеток на одговорно владеење и многу проекти за граѓаните на Струмица, рече Пакетов.