Владиката Петар велигденското послание го посвети на војната во Украина

Ниту мирољубивиот и благочестивиот Руски и Украински народ не ги предизвика судирите и немирите меѓу Русија и Украина, туку оние што сакаат да имаат воена светска моќ во оваа светска глобализација, вели Владиката Петар во своето велигденско послание. Тој вели дека секогаш се обвинуваат не оние што ги создале судирите и немирите, туку оние што се учесници во судирите и немирите, а сите немири се заради покажување моќ и приграбување на материјални богатства и ресурси.

-Најголемата трагедија е во тоа што, предизвикувачите на овие судири и немири, ништо не прават за тие да престанат, туку напротив, уште повеќе ги поттикнуваат со помагање, да продолжат тие судири во кои страдаат невини луѓе, а тие, пак, предизвикувачите на тие судири и понатаму остануваат неми сеирџии на страдањата на немоќниот народ, старците, мажите, жените и децата, вели Г.ПЕТАР, МИТРОПОЛИТ ПРЕСПАНСКО-ПЕЛАГОНИСКИ..

Кој е најповикан да ги прекине овие судири и војувања на браќа против браќа, ако не можат или не сакаат сите инволвирани страни во овие судири, прашува Владиката Петар.

-Очигледно, претставниците на светските организации за мир и безбедност, дека не само што се немоќни, туку за жал подлегнуваат на глобалистичките интереси и воени профитерства, па затоа сметаме дека не ќе можат тие пред Бога да се оправдаат, па дури и претставниците на Црквите и верските заедници, ако не седнат пред Празникот над празниците, Велигден на заедничка маса и не се договорат да изнајдат начин како да ги сопрат судирите, вели тој.

На крајот вели дека ако не се спречат овие воени судири, одговорноста покрај на светските управители на мирот и безбедноста на светот и Обединетите Нации, ќе падне и на сите претставници на Црквите и верските заедници, инволвирани во овие судири.