„Вашингтон пост“: САД планираат да го обноват украинскиот мировен процес со Русија

Администрацијата на американскиот претседател Доналд Трамп планира да ги обнови мировните преговори со Русија со цел решавање на украинската криза, пишува денеска „Вашингтон пост“, повикувајќи се на американски претставници и странски експерти. 

Тие напори ги предводи американскиот државен секретар Рекс Тилерсон, кој како што пишува весикот, за тоа прашање разговарал со рускиот министер за надворешни работи Сергеј Лавров. 

- Во тек е интензивен процес на составување нова стратегија и во него исто така е ангажиран и кабинетот на американскиот потпретседател Мајк Пенс, нагласува весникот. 

Во почетна фаза идејата на Тилерсон е да се обнови верзијата на мировните преговори, во кои беша ангажирана претходната американска Администација, со надеж дека новите околности и функционери можеби ќе донесат подобри резултати, се наведува во текстот.

Тилерсон додава дека планира и да именува специјален пратеник на Стејт департментот, кој ќе ги предводи новите напори по прашањето за Украина и кој ќе го обнови американско-рускиот дипломатски канал со помошникот на рускиот претседател, Владислав Сурков. 

- Меѓутоа сегашниот скандал во врска со истрагата за наводната вмешаност на Русија во американските претседателски избори во 2016 година ќе ги искомпликува работите, заклучува американскиот весник.