Успешно спроведен проектот „Поддршка на Секретаријатот за европски прашања“

 Заменик претседателот на Владата на Република Македонија задолжен за европски прашања, Арбр Адеми заедно со германскиот амбасадор Кристине Алтхаузер присуствуваа на свеченото затварање на проектот „Поддршка на Секретаријатот за европски прашања“ успешно спроведен од страна на Германската агенција за меѓународна соработка-ГИЗ и Секретаријатот за европски прашања.

Како што соопшти СЕП, во своето  обраќање Адеми ја истакна важноста на билатералната соработка помеѓу Република Македонија и Сојузна Република Германија, како и поддршката од германската Влада во спроведувањето на неопходните реформи за продолжување на евроатлантски пат, кој останува наша стратешка цел.

- Секретаријатот за европски прашања како главно координативно тело на Владата на Република Македонија, во последните две децении, постојано ја имаше поддршката од Германија во процесот на пристапување на Република Македонија кон ЕУ и имплементација на потребните реформи како за земјата така и за нејзиното пристапување кон европското семејство, рече Адеми.

Проектот траеше три години и во текот на неговото спроведување беа реализирани над 40 активности, во кои преку работилници, обуки и презентации учествуваа околу 1.600 лица, а беа објавени низа студии и публикации за потребите на Секретаријатот и други државни институции.