Ушаков: Русија се согласи со иницијативата на Трамп за воспоставување тридневно примирје

Помошникот на рускиот претседател, Јуриј Ушаков изјави дека Русија се согласила со иницијативата на американскиот претседател Доналд Трамп за воспоставување прекин на огнот со Украина од 9 до 11 мај и за размена на затвореници со Киев „1.000 за 1.000“ во овој период.

- По налог на рускиот претседател Владимир Владимирович Путин, ја потврдувам прифатливоста за руската страна на иницијативата што неодамна ја предложи американскиот претседател Доналд Трамп за прекин на огнот и за размена на воени заробеници помеѓу Русија и Украина, истакна Ушаков.

Претходно, украинскиот претседател Володимир Зеленски потврди дека Украина и Русија постигнаа договор за тридневно примирје и размена на илјада воени заробеници.

- Режим на прекин на огнот мора да се воспостави и на 9, 10 и 11 мај. Украина постојано работи на враќање на своите луѓе од руско заробеништво, објави Зеленски на платформата Икс.

Тој му се заблагодари на американскиот претседател Доналд Трамп и на неговиот тим за нивниот дипломатски ангажман.

- Му се заблагодарувам на претседателот на САД и на неговиот тим за нивниот конструктивен дипломатски ангажман. Очекуваме САД да се погрижат руската страна да ги исполни овие договори, истакна Зеленски.

Претходно, Трамп на сопствената социјална мрежа „Трут соушл“ објави дека на негово барање, Украина и Русија се согласиле на тридневно примирје и размена на илјада воени заробеници.

- Се надевам дека ова е почеток на крајот на една многу долга, смртоносна и тешка војна, наведе Трамп, додавајќи дека е постигнат напредок во преговорите за завршување на конфликтот. 

МИА