Украински дрон погоди една од најпрепознатливите згради во Чеченија

Украински дрон рано утринава го погоди облакодерот Грозни-Сити (Grozny-City) во главниот град на Чеченија, предизвикувајќи силна експлозија која уништи повеќе катови на еден од најпрепознатливите објекти во регионот.

Првите извештаи се појавија на опозицискиот чеченски канал на Телеграм NYISO, а потоа беа потврдени од украинската набљудувачка група Exilenova+ и рускиот провладин портал Readovka. Снимките од местото на настанот покажуваат дека дронот го погодил облакодерот некаде околу 28-от кат, разнесувајќи ја фасадата на повеќе катови.

Чеченските власти засега не коментираа.

Во облакодерот се наоѓаат некои од најважните институции на Чеченија, меѓу кои, Советот за безбедност на Чеченија, Министерството за туризам, Државната ревизорска комора, Регионалната изборна комисија, локалната канцеларија на Министерството за правда, Канцелариите на партијата Единствена Русија и Државната нафтена компанија Чеченнефтехимпром.

Exilenova+ истакна дека зградата се наоѓа непосредно до седиштето на ФСБ за Чеченија, кое можеби било примарна цел пред дронот да биде пренасочен, веројатно од руските системи за електронско војување.

Нападот се случи истиот ден кога руската воздухопловна агенција Росавијација воведе привремени ограничувања за летови на аеродромите во Грозни, Владикавказ, Магас и Минерални Води поради сè поголемите закани од дронови.

Ова е најновиот во низата украински напади во Чеченија. На 2 декември, дронови погодија објект на ФСБ во областа Ахкој-Мартан, нанесувајќи значителна штета.

МИА