Туск со предупредување до Полјаците: Не подлегнувајте на руски дезинформации

Полското Министерство за дигитални работи, исто така, предупреди на ширење дезинформации и објави список со наративи што доаѓаат од руски и белоруски извори. Тие вклучуваат тврдења дека Украина сака да ја вовлече Полска во војна со Русија и дека токму Киев испратил дронови врз соседната држава. Министерството посочи дека тврдењето оти Полска е беспомошна пред дроновите е дел од руската пропаганда чија цел е ширење паника.

Полскиот премиер Доналд Туск ги предупреди граѓаните да не подлегнуваат на руските кампањи за дезинформација и да не учествуваат во нивното ширење, еден ден по навлегувањето на дронови во полскиот воздушен простор, јави ДПА.

„Ширењето на руската пропаганда и дезинформација во сегашната ситуација е чин што ѝ штети на полската држава и директно ја загрозува безбедноста на татковината и граѓаните“, напиша Туск на социјалната мрежа „Икс“.

Тој додаде дека „глупоста и одредени политички убедувања“ не смеат да се сметаат за олеснителни околности.

Полското Министерство за дигитални работи, исто така, предупреди на ширење дезинформации и објави список со наративи што доаѓаат од руски и белоруски извори.

Тие вклучуваат тврдења дека Украина сака да ја вовлече Полска во војна со Русија и дека токму Киев испратил дронови врз соседната држава. Министерството посочи дека тврдењето оти Полска е беспомошна пред дроновите е дел од руската пропаганда чија цел е ширење паника.

Вчера полскиот премиер соопшти дека најмалку 19 дрона влегле во полското воздушно пространство.

МИА