Турција нуди награда од 14 милиони долари за апсење на 23 припадници на ИД

Турција вети 14 милиони долари награда за информации за 23 борци на Исламска држава, објави „Хуриет дејли њуз“.

Министерството за внатрешни работи на Турција ја актуелизира листата со имиња на барани терористи од ИД. Владата предвидува награди со вкупна вредност од над 42 милиони лири (повеќе од 14 милиони долари) за информација која може да помогне во апсење на терористите.

Листата е поделена на пет категории со различни бои - црвена (каде се вклучени најопасните терористи), сина, зелена, портокалова и сива.

Терористите Илхами Бал, Мустафа Докумаџ и Јонус Дурмаз се во црвениот дел од списокот. За информациија за секој од нив предвидена е награда од четири милиони лири.

Се смета дека Бал е емир на ИД во југоисточниот турски округ Газиантеп, а Докумаџ е лидер на екстремистичката група Докумаџлар формирана во југоисточниот турски град Адјаман за врбување на доброволци за ИД. Групата има извршено самоубиствени бомбашки напади.

За третиот терорист Дурмаз се претпоставува дека подготвувал терористички напад сличен на нападот во Истанбул од 19 март, при што загинаа пет лица.

За другите 20 терористи турската Влада предвидува награди до 1,5 милиони лири. На списокот има и пет жени, од кои две се од странство.