Трите лица во Црвени Брегови пронајдени во импровизиран верски објект починале од труење со јаглерод моноксид

Трите лица во Црвени Брегови пронајдени во импровизиран верски објект починале од труење со јаглерод моноксид, покажал наодот на судска медицина. Од Обвинителството попладнево за МИА потврдија дека се преземаат дејствија за утврдување на тоа што се случувало во неготинското село.

На 8 декември минатата година, МИА информираше дека три безживотни тела биле пронајдени во неготинското село Црвени Брегови.

- Јавен обвинител од Основното јавно обвинителство Кавадарци изврши увид на лице место во неготинското село Црвени Брегови, каде во мала куќа која се користела како импровизиран верски објект биле пронајдени три безживотни тела меѓу кои и на едно дете на возраст од околу 14 години. При првичниот преглед на лицата не се констатирани траги на насилство. Јавниот обвинител издава наредби за обдукција, како и наредба за испитување на исправноста на плинскиот уред на кој се грееле, рекоа тогаш од Обвинителството за МИА.