Трамп воведува 25 отсто царина на индиска стока, критикувајќи ги врските со Русија

Американскиот претседател Доналд Трамп соопшти дека воведува царина од 25 проценти на стоки од Индија почнувајќи од петок, остро критикувајќи го Њу Делхи за неговите воени и енергетски врски со Русија.

Во објава на неговата платформа Трут Соушл (Truth Social) Трамп денеска ја опиша Индија како „пријател“, но ја обвини земјата за водење на неправедни трговски практики кои ги ставаат американските бизниси во неповолна положба.

Индија има „напорни и одбивни“ трговски бариери кои го држат нејзиниот пазар затворен за странски компании, напиша тој, додавајќи дека нејзините царини се „превисоки“.

Трамп исто така ги критикуваше врските на Индија со Русија, обвинувајќи ја најнаселената земја во светот дека помага во финансирањето на инвазијата на Москва врз Украина, која сега влегува во четвртата година.

„Тие отсекогаш купувале огромно мнозинство од својата воена опрема од Русија и се најголемиот купувач на руска енергија, заедно со Кина, во време кога сите сакаат Русија да престане со убивањето во Украина – сето ова не е добро“, напиша Трамп.

Покрај новата царина, Трамп изјави дека Индија ќе се соочи и со финансиска „казна“ поради нејзините купувања од Русија, иако не даде дополнителни детали.

Во минатото, украинскиот претседател Володимир Зеленски го повикуваше индискиот премиер Нарендра Моди да ја прекине зависноста од евтина руска енергија и да запре со купување воено вооружување од Москва, наведувајќи дека такви чекори би помогнале да се стави крај на војната.

Првично, Трамп објави царинска стапка од 26 отсто за Индија на 2 април, претставувајќи ги специфичните стапки по земји на денот што тој го нарече „Ден на ослободувањето“. Таа царина подоцна беше одложена поради преговори, со нов краен рок поставен за петок, 1 август.

МИА