Трамп избран за претседател на САД

Доналд Трамп е избран за нов американски претседател. Тој уште претпладнево го надмина бројот од 270 електори колку што му се потребни за да го добие новиот четиригодишен мандат. Вети многу работа и ја најави златната доба за Америка

Неговата противкандидатка актуелната потпретседателка Камала Харис се уште не го призна поразот. Од нејзината кампања известија дека таа на јавноста ќе и се обрати утре

Светските лидери му ја честитаа победата на Трамп.

Макрон и Шолц разговараа и телефонски за да го зајакнат европското единство, откако претходно и двајцата му ја честитаа победата на Трамп.

Честитки стигнаа и oд претседателката на ЕК Фон Дер Лајен и речиси сите европски лидери

- Се сеќавам на нашата одлична средба со претседателот Трамп во септември, кога детално разговаравме за стратешкото партнерство меѓу Украина и САД, планот за победа и начините за ставање крај на руската агресија врз Украина, порача украинскиот претседател Зеленски во својата честитика

Победата на Трамп како неповолна за Украина ја оцени поранешниот руски претседател Медведев.

Кремљ се уште не знае дали Путин ќе му честита на Трамп, а портапаролот Песков рече дека САД и натаму се непријателска земја за Русија. 

Официјална честитка се уште нема ниту од Кина. Пекинг ја почитува изборната волја на граѓаните, а изборите ги смета за внатрешна работа на секоја држава, рече портарполката на кинескиот претседател прашана дали Си Џи Пинг ќе му ја честита победата на Трамп.

Избраниот американски претседател имаше тежок пат до овалната соба. Во текот на кампањата се соочи со серија кривични постапки, а беше мета и на несупешен атентат. Според американските закони Трамп официјално ќе стапи на служба по инаугурацијата закажана за 20 јануари идната година.