Тимерманс: На Турција не и нудиме „беплатно возење“

Потпретседателот на Европската комисија Франс Тимерманс тврди дека со договорот ЕУ-Турција за запирање на приливот мигранти во замена за отстапки кон Анкара, Брисел не и нуди на Турција „бесплатно возење“.

На прес конференција Тимерманс изјави дека Турција мора да примени мерки до крајот на април за да може од крајот на јуни Турците да патуваат во ЕУ без визи.

– Секако, не и нудиме на Турција бесплатно возење, изјави Тимерманс.

Тој додаде дека планираниот договор, со кој мигрантите кои ќе стигнат до Грција ќе бидат враќани во Турција, не значи кршење на меѓународното право. Тимерманс вели дека со договорот „не се врти грб на бегалците“ бидејќи за нив ќе биде овозможена адекватна меѓународна заштита, во ЕУ или во Турција.

– Бегалците ќе се враќаат само во согласност со меѓународните и европски правни рамки...Секој случај мора да се процени одделно во согласност со повелбата за основните права и европските директиви, истакна Тимерманс.

Според него, барателите на азил мора да имаат и целосна можност за поднесување жалба.