Тешко повредена 33 годишна жена пешак

Триесет и тригодишна жена пешак од Јегуновце е тешко повредена откако во неа удрило возило „Мерцедес“ управувано од 36 годишник на булеварот „Маршал Тито“ во Тетово. Сообраќајната несреќа се случила вчера околу 16 часот.

-Патничко моторно возило „Мерцедес“ со тетовски регистарски ознаки, управувано од Х.Х.(36) од тетовски Порој, удрило во 33-годишната И.Ѓ.(пешак) од Јегуновце. Во незгодата, И.Ѓ. се здобила со тешки телесни повреди, констатирани во тетовската Клиничка болница, информира денес Марјан Јосифоски, портпарол на СВР Тетово.

Во текот на декември тетовската полиција бележи и сообраќајна несреќа во која имаше и пешак кој го загуби животот. На 6 декември на патот Тетово-Јажинце, животот го загубил И. А (43) од гостиварското село Дебреше, а 36 – годишен маж од селото Пршовце беше приведен како осомничен за сообраќајката затоа што по настанот заминал од местото.