Таравари: Наскоро ќе има нови директори, бараме најдобри решенија

Наскоро ќе има нови директори, расмислуваме и секогаш мислиме за најдобри решенија, затоа и не брзаме. Здравството треба полека да изнаоѓа луѓе кои знаат и умеат убаво да управуваат со здравствените институции, изјави денеска министерот за здравство Арбен Таравари.

Ако имаме успешни директори, посочи, ќе бидеме успешни како министри, а и Владата.

- Затоа не брзаме, ќе изнајдеме најдобри решенија, само дајте ни малку време, истакна Таравари, одговарајќи на новинарско прашање по промоцијата на проектот „Добредојде бебе“.

Во врска со тоа до каде е постапката со гинекологот во Шуто Оризари, рече дека гинекологот е најден, веќе е нострифицирана дипломата, има земено лиценца за работа од Лекарската комора и во тек е процедура за регистрација на приватна здравствена установа или консеционерство.

- Се надевам за неколку недели ќе завршат процедурите, додаде Таравари.