Средба на Иванов со Младен Иваниќ, член на Претседателството на БиХ

Претседателот на Република Македонија, Ѓорге Иванов, денеска го прими Младен Иваниќ, член на Претседателството на Босна и Херцеговина, кој престојува во работна посета на Република Македонија.

Како што соопшти кабинетот на претседателот, двајцата соговорници констатирале добра билатерална соработка меѓу двете земји, без отворени прашања, и изразиле заемен интерес за јакнење и продлабочување на соработката во сите сфери од заеднички интерес.

На средбата, се наведува, биле разменети мислења за состојбите во регионот, во контекст на актуелните предизвици и неговите евроатлански перспективи. Членот на Претседателството Иваниќ,  го запознал претседателот Иванов со актуелните политичко-економски состојби во Босна и Херцеговина и со клучните предизвици на земјата во наредниот период. Во таа насока, биле реафирмирани заложбите за натамошна меѓусебна помош, поддршка и соработка, со цел побрзо исполнување на стратешките цели на двете земји.

- Соговорниците разменија информации за престојаните состаноци на регионалните иницијативи во кои учествуваат двете земји, како и предлог-идеи за унапредување на регионалната и соработката на мултилатерален план. Притоа, беше изразена загриженост од одредени ретроградни процеси, кои во актуелниот момент, кога Европа и регионот се соочуваат со сериозни безбедносни предизвици, можат дополнително да ги влошат состојбите и односите во регионот, стои во соопштението.

Претседателот Иванов, се додава, ја нагласил подготвеноста на Република Македонија за натамошно унапредување на односите со Босна и Херцеговина и за продлабочување на соработката особено во областа на економијата и безбедноста. Економската соработка, констатирале двајцата соговорници, не го следи нивото на политичките односи меѓу двете земји, ниту пак соодветствува со реалните можности и капацитети.

Заемен е заклучокот дека е неопходно низ дијалог и забрзана интеграција, како и со фокусираност на крупни инфраструктурни поврзувања, да се дојде до политичка, економска и безбедносна консолидација во регионот на југоисточна Европа. Воедно, претседателот Иванов го реафирмирал интересот за официјална посета на тројцата членови на Претседателството на Босна и Херцеговина на Република Македонија, се наведува во соопштението од кабинетот на претседателот Иванов.