Спикерот на бугарското Народно собрание свика вонредна седница поради рускиот ултиматум и тензиите во Украина

Претседателот на Народното собрание на Бугарија Никола Минчев утре закажа вонредна седница.

Како што јави дописникот на МИА од Софија, на дневен ред ќе бидат излагања на премиерот на Бугарија Кирил Петков, министерот за одбрана Стефан Јанев, министерката за надворешни работи Теодора Генчовска и шефовите на бугарските специјални служби.

Повод за заседанието е руско-украинскиот конфликт и тензијата меѓу НАТО и Руската Федерација и улогата на Бугарија во процесот на одлучување на НАТО за прашања, како и распоредувањето на вооружените сили на сојузниците на територијата на Република Бугарија.

Барање за вонредна седница поднесоа 59 пратеници од коалицијата ГЕРБ-УДФ.

Претходно денеска бугарскиот премиер ќе заседава со Советот за безбедност на бугарската Влада, а утре ќе се одржи владин состанок на кој ќе се разговара за тензиите околу плановите на Украина и на сојузниците во НАТО за зајакнување на источното крило на Алијансата.