Создадени услови за редовно работење и плати во „Колска“

Создадени се услови за правно спроведување на владините одлуки кои обезбедуваат редовно работење и исплата на заостанатите плати во Фабриката за шински возила „Колска“ од Велес.

- На денешната седница на Владата е усвоена информацијата за донесување акти за зголемување на паричен влог на основната главнина на Друштвото Фабрика за шински возила Велес дооел Велес (Колска Велес), со што се обезбедени условите за правно спроведување на одлуките кои обезбедуваат редовно работење и исплата на заостанатите плати во ова друштво, соопшти вечерва владината служба за информирање.

Вработените во „Колска“ на 29. минатиот месец го прекинаа протестот со кој преку двочасовни прекини на железничкиот сообраќај бараа  исплата на заостанатите шест плати, откако на средба со вицепремиерот за економски прашања Кочо Анѓушев добија ветување  за трајно решевање на состојбата во нивниот капацитет.

Според претставниците на Владата и на вработените, единствено решение за проблемите во „Колска“ е нејзино враќање во состав на „Македонски железници“.