Советот на општина Дебар и комисиите работат во интерес на граѓаните

Советот на општина Дебар и комисиите кои функционираат во рамки на истиот секогаш работат во интерес на доброто на граѓаните и развојот на општината во целина.

Оваа  оценката ја изнесе претседателот на Советот на општина Дебар, Башким Машкули.

- Советот брои 15 члена. Истите се од различни политички партии и од различна етничка припадност. Досега имаме одржано 49 седници на кои се донесени многу одлуки и решенија. Но, она што е најбитно е фактот што сите советници, секогаш при донесувањето на било кој документ, пред себе ги имале само интересите на граѓаните и општината во целина, оценува Машкули.

Првиот меѓу дебарските советници, посочува дека истата хармонија, разбирање и определба да се одлучува во интерес на граѓаните владее и во работата на комисиите формирани од Советот.

- Десетте комисии при Советот работат во функција на донесување на секоја одлука или друг документ од страна на советот. Во нив членуваат советници, но повеќето се стручни лица-експерти од соодветната област, нагласува Машкули.

Меѓу другите, во рамки на советот  постојат, комисијата за статут и прописи, комисијата за финансии, буџет и локален економски развој, комисијата за урбанизам, комунални дејности и заштита на животната средина, за општествени дејности, за мандатски прашања, избори и именувања, потоа комисијата за односи меѓу заедниците, како и родова рамноправност.