Сообраќајни контроли за алкохолизирани возачи во полошко изминатиот викенд

Вкупно 22 возачи, кои управувале возила под дејство на алкохол, открила полицијата при акциските контроли спроведени во тетовско – гостиварскиот регион изминатиот викенд, информираа од СВР Тетово.  Според нивните податоци со контролите биле опфатени 121 возач од кои во тетовско 72 и 49 во гостиварско.

При контролите на тетовското подрачје биле откриени 17 возачи кои ги управувале возилата под дејство на алкохол и сите биле исклучени од сообраќај, при што на 16 времено им биле одземени возачките дозволи. На сите 17 прекршители им биле изготвени мандатни платни налози и ќе се соочат со соодветни глоби зависно од степенот на алкохолизираност. Покрај овие биле откриени и 13 други видови прекршоци.

Во акциските контроли во гостиварско бројот на алкохолиизирани возачи изнесувал пет. Тие биле исклучени од сообраќај, времено им биле одземени возачките дозволи и изготвени им биле три мандатни платни налози и две барања за поведување прекршочна постапка. Во гостиварските активности биле откриени и седум други прекршоци.

Глобата за управување под дејство на алкохол се движи од 250 до 400 евра во денарска противвредностм а за овој вид прекршок предвидена е и заштитна мерка забрана за управување од три до 12 месеци, во зависност од категоријата на возилото со кое е сторен прекршокот.