Шулц го осуди Сименс за планот да отпушти 6.900 работници

 Лидерот на германската Социјал-демократска партија Мартин Шулц денеска обвини дека планираното отпуштање на 6.900 работници од германскиот технолошки гигант  Сименс е анти-социјална мерка.

Шулц зборуваше на собир на младинската организација на СПД каде го осуди потегот на Сименс, јави агенцијата БТА.

- Компанија која што соопшти дека заработила 6,3 милијарди евра и потоа отпушта 6.900 работници дејствува анти-социјално, а не социјално, изјави Шулц.

Сименс минатата недела најави дека ќе отпушти два процента од своите работници, од кои половината ќе бидат отпуштени од фабриките во Германија. Како резултат на тоа, илјадници германски работници во фабриките на Сименс организираа штрајк.

Директорот на Сименс Џо Кезер објави отворено писмо во весникот „Ханделсблат“ во кое го критикуваше Шулц за неговите популистички и
агресивни повици против Сименс, кои може да и наштетат на компанијата.