Шест лица загинаа во експлозија во руски рудник

Шест лица загинаа во синоќешната експлозија во рускиот рудник за јаглен „Севернаја“, меѓу кои петмина спасувачи и еден рудар, изјави портпаролот на Министерството за вонредни ситуации, јави ТАСС. 

Во експлозијата се ранети пет лица. 

Синоќа во рудникот имаше трета моќна експлозија, по првите две на 25 февруари, кога загинаа четворица рудари, а 26 останаа под земја. 

- Нема шанси некој од 26 рудари да преживеал, изјави министерот за вонредни ситуации Владимир Пучков.

Техничкиот директор на компанијата „Воркутаугол“, која управува со рудникот изјави дека техничкиот совет детално ја проценил ситуацијата во рудникот и оти смета дека таму повеќе нема преживеани.

На 25 февруари во рудникот во руската република Коми истече метан, кој предизвика две експлозии, уривања и пожар. Во тој момент под земја беа 111 лица. Евакуирани беа 81 рудар, четворица загинаа, а 26 останаа заробени.