Сергеј за своите посвоени ќерки: Тие знаат дека мама и тато ги родија од срце

Сергеј Четковиќ, црногорскиот пејач кој во моментот е актуелен како новиот член на жирито во „Ѕвездичките на Пинк“, е татко на две девојчиња, кои ги посвои заедно со својата сопруга Кристина.

 

– Јас се чувствувам како нивен биолошки родител. Лола има седум, а Мила скоро пет години. Ми пречи кога ми велат дека се посвоени, бидејќи јас не ги доживувам на тој начин. Она што секогаш им го зборуваме и што тие две многу добро го знаат е дека мама и тато ги родија од срце. Така е од првиот ден – раскажа пејачот во една српска емисија.

 

Четковиќ вели дека и тој и неговата сопруга имале многу препреки за да посвојат, но решиле заедно да ги пребродат, бидејќи навистина сакале да станат родители.

 

– Има многу бариери, ментални бариери – што ќе кажат комшиите, што ќе речат моите најблиски. Јас живеам во Белград веќе 12 години, но во Црна Гора се уште се строги по тоа прашање, макар што и таму се менуваат работите на подобро – рече Четковиќ.

 

Пејачот е среќен за својата одлука, затоа што ќерките не само што му го разубавиле животот, туку и, како што вели, личат на него.

 

– Секогаш велам дека родители не се оние што ќе го родат детето, туку оние што ќе се грижат и ќе го пазат, а децата стануваат огледало на своите родители, биле тие биолошки или не – вели тој.