СЕХА: Пресуди деконцентрацијата на Дибиров

Ракометарите на Вардар несфатливо го загубија финалето во СЕХА лигата со Веспрем со 28-26 и дозволија Унгарците не само да го одбранат трофејот во регионалното натпреварување туку и да освојат пол-позиција пред двомечот во 1/4 финалето во Лигата на шампионите.

Црвено-црните одлично го започнаа мечот а на 5-6 минути до крајот имаа водство од 25-24 и топка во аут. Дибиров направи почетничка грешка при изведувањето на аутот и наместо да го зголемиме водството на недостижни два гола разлика дозволивме серија од 3-0 на противникот и водство од 27-25 откако претходно на 26-25 Дибиров од чиста позиција не реализираше „зицер“ дозволувајќи му на Алиловиќ да му ја фати топката.

Потоа Циндриќ намали на 27:26, а Карачиќ наместо да израмни, направи фаул во напад. Унгарците дадоа уште една шанса, но Циндриќ биеше во пречката. Кога Наѓ погоди за 28:26, се чини дека веќе беше се готово. Циндриќ промаши втор пат по ред, а до крајот остана истиот резултат.